Aldargamall bjór er bitur og bragðvondur

08.01.2016 - 01:12
Bjórglös með mismunandi tegundum af bjór.
 Mynd: Stocksnap.io
Rúmlega aldargamall bjór, sem fannst í Kanada á síðasta ári, var drykkjarhæfur en ekki sérstaklega góður að sögn vísindamanns sem smakkaði hann. Bjórinn fannst á hafsbotni í nóvember og var hann bruggaður í Halifax einhvern tímann á milli 1872 og 1890, örfáum árum eftir að Kanadaríki varð myndað árið 1867.

Bjórflaskan var nærri því full þegar hún kom úr Atlantshafinu. Vísindamenn rannsökuðu hana í bak og fyrir og aldursgreindu hana af lögun hennar og áletrun innan í tappa hennar. Að sögn Andrew MacIntosh, vísindamanns við Dalhousie háskólann í Halifax, var lágt sýrustig í bjórnum. Enn var eitthvað magn áfengis í honum og þrátt fyrir aldur var hann ekki eitraður. Hann sagði bjórinn hafa verið bitran og bragðvondan. Lyktin var með keim af brennistein og reyk. Skrýtið mintubragð var af bjórnum að sögn MacIntosh, einnig smá salt og var hann furðubitur.

Bjórinn verður sendur til Skotlands þar sem frekari rannsókn verður gerð á honum. Gögnin verða svo borin saman við aðrar bjórtegundir þess tíma til þess að varpa frekara ljósi á fyrstu bjóra Kanada.


Deila frétt



Róbert Jóhannsson
Fréttastofa RÚV
08.01.2016 - 01:12