Aðgangur að Núpsstað heftur
Frá Núpsstað. Mynd: Shutterstock
Ferðamenn eiga ekki lengur greiðan aðgang að bænhúsinu á Núpsstað. Þar hefur leiðinni að bílastæðinu verið lokað með hliði og ferðamenn sem vilja skoða bænhúsið verða að leggja bílum sínum við þjóðveginn. Leiðsögumaður sem fréttastofan ræddi við í dag, segir að þetta skapi stórhættu við veginn.
Auk þess sem aðkoman hefur verið heft, hafa verið tekin niður fræðsluskilti, sem Þjóðminjasafnið hafði veg og vanda af.
Bænhúsið á Núpsstað er í eigu Þjóðminjasafnsins, sem hefur haldið því við, sem og bæjarhúsunum sem gerð voru upp og endurhlaðin fyrir nokkrum árum. Þá eru náðhús á Núpsstað sem munu vera í umsjá ferðamálayfirvalda.
Lengst af hefur umsjón með Núpsstað verið á vegum Þjóðminjasafnsins, síðar í samstarfi við Vatnajökulsþjóðgarð og sveitarstjórnina þar eystra. Það samstarf er ekki lengur við lýði, eftir að nýr eigandi tók við staðnum.
Ertu með athugasemd vegna fréttarinnar? Sendu á frettir@ruv.is
