460 milljarðar fóru í fasteignakaup í fyrra

02.01.2017 - 08:54
Mynd með færslu
 Mynd: Anton Brink  -  Ruv.is
Heildarviðskipti með fasteignir námu tæplega 460 milljörðum króna á árinu sem var að líða. Um 12.400 kaupsamningum var þinglýst á árinu. Meðalupphæð á hvern samning var um 37 milljónir króna.

Þetta kemur fram í markaðsfréttum Þjóðskrár Íslands.

Þar er bent á til samanburðar að árið 2015 hafi veltan verið rúmlega 370 milljarðar, kaupsamningar 11.298 og meðalupphæð hvers samnings um 33 milljónir króna. Heildarvelta fasteignaviðskipta hafi því aukist um rúmlega 24% frá árinu 2015 og kaupsamningum fjölgað um tæplega 10%. 

Sé litið til höfuðborgarsvæðisins stefni heildarupphæð þinglýstra kaupsamninga árið 2016 í um 350 milljarða króna, kaupsamningar verði um 7.950 og meðalupphæð kaupsamnings um 44 milljónir króna.

Heildarupphæð þinglýstra kaupsamninga á höfuðborgarsvæðinu á árinu 2015 var 285 milljarðar króna og fjöldi kaupsamninga var 7.369. Meðalupphæð samninga árið 2015 var um 38,6 milljónir króna. Heildarvelta á höfuðborgarsvæðinu hefur því aukist um tæplega 23% og fjöldi kaupsamninga hefur aukist um tæplega 8%, að því er fram kemur í markaðsfréttunum.


Deila frétt



02.01.2017 - 08:54